रास्वपा महाधिवेशन : यस्तो छ खानाकाे तालिका

दर्पण दैनिक

८ असार २०८३,१४:०५

चितवन । राष्ट्रिय स्वतन्त्र पार्टी (रास्वपा) को पहिलो महाधिवेशन चितवनको भरतपुरमा जारी छ । आइतबार भरतपुरको गेस्टहाउस चौरमा उद्घाटन भएको महाधिवेशनको बन्दसत्र आज (सोमबार) देखि चितवन उद्योग संघको प्रदर्शनी केन्द्रमा सुरु हुँदैछ । विहानैदेखि सुरू हुने भनिए पनि अहिलेसम्म बन्दसत्र सुरू हुन सकेको छैन ।

महाधिवेशनमा देशभरका विभिन्न जिल्ला, प्रवास र विभिन्न तहका कमिटीहरूबाट करिब ४ हजार १०० प्रतिनिधिहरू सहभागी हुन चितवन आइपुगेका छन् ।

प्रतिनिधि व्यवस्थापन उपसमितिका अनुसार प्रतिनिधि र अन्य सहभागी गरी कुल ५ हजार जनाको व्यवस्थापन मिलाइएको छ ।

महाधिवेशनमा सहभागी हुन आएका प्रतिनिधिहरूले आइतबार पार्टीको समन्वयमा आफैँले होटल खोजेर बसेका थिए । आइतबारको खानपिनको व्यवस्था पनि उनीहरूले आफैँ गरेका थिए । रास्वपाले प्रत्येक प्रतिनिधिसँग ५ हजार रुपैयाँ अधिवेशन शुल्क उठाएको छ । प्रतिनिधिहरूले होटलमा बास बसेको रकम भने आफैँले भुक्तानी गर्नुपर्ने व्यवस्था गरिएको छ ।

खानामा के के ?

आजदेखि भने रास्वपाले नै प्रतिनिधिहरूको खानपानको पूर्ण व्यवस्थापन गरेको छ । महाधिवेशनस्थलमै बिहान ७ बजेदेखि ‘ब्रेकफास्ट’ (नास्ता) वितरण सुरु भइसकेको छ । भोजन व्यवस्थापन उपसमितिका अनुसार प्रतिनिधिहरूलाई बिहानको नास्ता, बिहानको खाना, दिउँसो हाइटी र बेलुकाको रात्रीभोजको व्यवस्था गरिएको छ ।

बिहानको खानामा खसीको मासु र भातलाई मुख्य परिकार बनाइएको छ । ५ हजार सहभागीका लागि बिहानको खानामा मात्रै दैनिक झण्डै ८ क्विन्टल खसीको मासु खपत हुने अनुमान गरिएको छ ।

बिहान र बेलुकाको खानामा कम्तीमा १० प्रकारका परिकारहरू (आइटम) समावेश गरिनेछ, जसमा जिरा राइस, दाल, तरकारी, अचार, सलाद र दही रहनेछन् ।

मासु नखाने (शाकाहारी) सहभागीका लागि पनिर र च्याउको छुट्टै व्यवस्था गरिएको छ भने साथमा मौसमी तरकारी पनि राखिनेछ । बेलुकाको खानामा भने ‘मिक्स भेज’ तरकारी खुवाइने जनाइएको छ ।

खानपान व्यवस्थापनको जिम्मेवारी चितवनको क्षेत्रपुरस्थित दियालो फुडल्याण्डले तीन दिनका लागि लिएको छ ।

सहभागीहरूलाई खानाका लागि कुपनको व्यवस्था गरिएको छ । खाना वितरणका लागि १५ वटा डबल-साइड टेबल स्टलहरू राखिएका छन्, जसले गर्दा भीडभाड नभई सहजै खाना लिन सकिनेछ ।

यस्तो छ खाना तालिका

बिहान ७ बजेदेखि: ब्रेकफास्ट

दिउँसो १:०० देखि २:३० सम्म: बिहानको खाना

दिउँसो ३:०० देखि ५:०० सम्म: हाइटी

बेलुका ६:०० देखि ९:०० सम्म: बेलुकाको खाना

खाना तथा खाजा व्यवस्थापनका लागि फुडल्याण्डले झण्डै २०० कर्मचारी परिचालन गरिएको जनाएको छ ।