गणतन्त्र ल्याउने लडाकुको अपमान नगर्न माओवादी सांसद सापकोटाकाे चेतावनी

दर्पण दैनिक

१५ बैशाख २०८०,१५:५९

काठमाडौं । माओवादी केन्द्रका तर्फबाट निर्वाचित सांसद माधव सापकोटाले दुईलाखसँग जोडेर माओवादीका लडाकुको अपमान नगर्न चेतावनी दिएका छन् । प्रतिनिधिसभाको आजको बैठकमा जीवन आहुती दिन तयार भएर लागेका लडाकुका लागि दुईलाखले केही नहुने भन्दै उनीहरूको अपमान नगर्न चेतावनी दिएका हुन् ।

'तपाईको दुई लाख पैसाले महान युद्ध लडेका लडाकुहरू (जसले युद्ध लडेर ल्याएको गणतन्त्रमा तपाई हुनुहुन्छ) तीनलाई अपमान गर्ने ?,' सापकोटाले भने, 'जसले लडेर ल्याएको व्यवस्थामा तपाई हुनुहुन्छ, त्यसैमा उहाँहरूलाई अपमानित गर्ने छुट तपाईलाई छैन ।'

उनले अहिले पनि गोली शरीरमा बोकेर हिडिरहेको, उपचार गर्न नसकेकाहरूको अवस्था दर्दनाक भएको भन्दै उनीहरूको अवस्थालाई मजाकमा नलिन आग्रह गरे ।

सापकोटाले यति भनेर माओवादीका अयोग्य लडाकुहरूलाई दुईलाख दिने निर्णय २०७३ सालको सरकारले बजेटमै गरेको भन्दै त्यो बजेट ल्याउने अर्थमन्त्रीको पार्टी नेकपा (एमाले) अहिले विरोधमा रहेको बताए ।

उनले अहिलेको सरकारले त्यही बेलाको कार्यक्रम कार्यान्वयनको कार्यविधि मात्र बनाइरहेको पनि स्मरण गराए ।

'अहिले अयोग्य लडाकुको विषयमा जे कुरा उठिरहेको छ । यो कुरा ०७३ साल जेठ १५ गते शनिबार माननीय अर्थमन्त्री विष्णु पौडेललेले ल्याएको बजेटको १९ नम्बरमा बुँदामा समेटिएको थियो,' सापकोटाले भने ।

उनले त्यति भनेर त्यसबेलाको बजेट वक्तव्यको १९ नम्बर बुँदा पढेर सुनाएका थिए । उनले त्यो बुँदामा ‘अयोग्य तथा स्वेच्छिक अवकाशमा गएका लडाकुहरूलाई रकम उपलब्ध गराउन दुईलाख विनियोजन गरेको छु’ भन्ने वाक्यांशको पढेर हेर्दा यस अघि बोलेको पौडेल बाहिरिसकेका थिए ।

'माननीय विष्णु पौडेल भर्खरै निस्कनुभएको छ । उहाँले ल्याएको बजेटमा यस्तो उल्लेख छ । त्यसपछि यसविरुद्ध सर्वोच्चमो रिट गएपछि यो कुरा केही समय थाती रहेको थियो । त्यसमा ०७८ फागुन १ मा सर्वोच्चबाट रिट खारेजसँगै निर्देशनात्मक आदेश आएको छ,' सापकोटाले भने, 'सर्वोच्चको रिट खारेज गर्दै पुरानै वक्तव्य र विनियोजन ऐनअनुसार कार्यान्वयन गर्न पत्र पठाएपछि सरकारले अहिले कार्यविधि मात्र बनाएको हो ।' उनले सत्यतथ्को कुनै खोजविन नगरीकन अरुमाथि दोषारोपण मात्र गरिरहेको उल्लेख गरे ।