.png "Win Recruit Nepal"){kind=logo}
दाङ । तुलसीपुर उपमहानगरपालिका–१० नयाँ गाउँमा वडा–६ निवासी विष्णुमणि आचार्यले व्यावसायिकरूपले कालिज पालन गरेका छन् । सोही पेसामा रमाएका उनको दिनचर्या कालिजलाई दानापानी खुवाउन र रेखदेखमा बित्ने गरेको छ । अवकाश प्राप्त राष्ट्रसेवक आचार्यले भने, ‘अवकाश भएपछि चार महिनासम्म घरमै बसें । दिनभर घरपरिवार साथीभाइ तथा आफन्तसँग त्यत्तिकै बसेर समय बिताउँथे । ३० वर्षसम्म जागिरमा व्यस्त भएको मान्छे अब यसरी सधैँ कसरी बस्नुजस्तो लागेकाले यो व्यवसाय सुरु गरेको हुँ ।’ सुरुमा सामाजिक सञ्जाल (युटुब)मार्फत व्यावसायिकरूपमा पालन गरिएका कालिजको भिडियो हेरें । त्यसपछि कालिजपालन गरिएको जिल्लाका दुई ठाउँमा पुगेँ । घरमा फर्केपछि उत्साहित भएर यो व्यवसाय सुरु गरेको उनले सुनाए ।
‘दाङ उपत्यका कालिज पाल्न उपयुक्त वातावरण भएको थाहा पाएरै यो व्यवसाय सुरुआत गरेको हुँ अहिलेसम्म तीन सयभन्दा बढी कालिज बिक्री गरिसकेँ । अझै पाँच सय वटा बिक्रीका लागि तयारी अवस्थामा छन् ।’ उनले भने । उनले ‘चाणक्य मल्टी प्रपोज एग्रो फार्म एन्ड रिसर्च सेन्टर’ प्राली खोलेर २५ लाखको लागतमा कालिजपालन सुरु गरेका हुन् ।
ह्याचिङ गरी उत्पादन गरिएका एक दिनका १ सय ८१ बचेरा ५ सय ५० रुपैयाँका दरले किनेर यो व्यवसाय सुरुआत गरेका उनको व्यवसाय अहिले फस्टाउँदै गएको छ । उनले एक जनालाई रोजगारी पनि दिएका छन् । आचार्यका अनुसार ३५ डिग्री सेल्सियसभन्दा कम तापक्रम हुने स्थान कालिज पाल्न राम्रो मानिन्छ । दाङको तापक्रम लगभग त्यस्तै छ । ‘अहिलेसम्म पाँच सय कालिज बिक्री गरिसकेँ । सुरुमा एउटा कालिजलाई २ हजार ५ सयमा बिक्री गरें । अहिले भने दुई हजारसम्ममा दिने गरेको छु । अण्डा पनि राम्रोसँग बिक्री भएको छ । एउटा अण्डा एक सयमा बिक्री हुन्छ । सुरुआतमै धेरै आम्दानीको अपेक्षा लिन हुँदैन विस्तारै आम्दानी हुन्छ’, उनले भने ।
६ महिना पुगेपछि कालिज वयस्क हुन्छ र मासुका लागि उपयुक्त मानिन्छ । भाले कालिज एकदेखि डेढ केजीसम्म र पोथी आठ सय ग्रामदेखि एक केजीसम्मको हुन्छ । कालिजले घाँस, मकै खान्छ । अण्डा दिने पोथीका लागि दाना पनि दिन उपयुक्त हुन्छ । कालिजलाई हालसम्म कुनै रोग नलागेकाले औषधि पनि दिनुपरेको छैन तर अवलोकन तथा खरिद गर्ने जानेलाई जुत्ता, चप्पल खोलेर खुट्टामा औषधि छर्केर मात्र नजिक जान दिने गरेको उनले सुनाए ।
‘कालिज फुर्तिलो र लडाकु स्वभावको हुन्छ । त्यसैले चुच्चो मुखमा क्याप लगाउनुपर्छ । विदेशमा त्यही गरिन्छ । यहाँ भने त्यसो गरिएको छैन उनीहरू लड्न लागेपछि औजारको सहायताले छुट्याउने र केही समय छुट्टै ठाउँमा राख्ने गरेको छु’, उनले भने, ‘भाले र पोथी कालिजलाई छुट्टाछुट्टै राखिएको र अहिले पोथी बिक्री नगरी अण्डालाई ह्याचिङ गरी बचेरा निकाल्नका लागि तयारी गरिएको छ ।’
‘बजारमा माग त धेरै छ, तर यो वर्ष पोथी कालिज र बच्चा एउटा पनि नबेची धेरै उत्पादन भएमा अर्को वर्षदेखि मात्रै बिक्री गर्छु,’ उनले भने । पढेलेखेकाले पैसा कमाउनकै लागि जागिर खानै पर्ने या विदेश नै जानुपर्छ भन्ने छैन तर राज्यले पनि किसानलाई प्रोत्साहन हुने कार्यक्रम ल्याउन उनको माग छ । - रासस
.jpg)
_GnRvz8QHio.jpg)
