.png "Win Recruit Nepal"){kind=logo}
वाशिङ्टन । उद्योगहरूबाट हुने वायु प्रदूषण कम गर्न र वायु गुणस्तर व्यवस्थापनलाई सुदृढ पार्न नेपालको स्वच्छ वायु र समृद्धि आयोजनालाई विश्व बैंकको सहयोग गर्ने भएकाे छ । विश्व बैंकको कार्यकारी निर्देशक बोर्डले वायु प्रदूषण कम गर्न र वायु गुणस्तर व्यवस्थापनलाई सुदृढ बनाउन नेपाल स्वच्छ वायु र समृद्धि आयोजनाका लागि ५ करोड २० लाख डलरको ऋण स्वीकृत गरेको हाे ।
यस आयोजनाले विशेष गरी औद्योगिक र व्यावसायिक बोयलर तथा भट्टीहरूबाट निस्कने सूक्ष्म कणहरू (पिएम२.५) को उत्सर्जन कम गर्न र वायु गुणस्तर व्यवस्थापनका लागि राष्ट्रिय प्रणालीहरूलाई सुदृढ बनाउन सहयोग गर्नेछ । आयोजनाले विशेष गरी काठमाडौं उपत्यका, तराई र वरपरका पहाडी क्षेत्रहरूलाई केन्द्रित गर्नेछ, जहाँ वायु प्रदूषणले जनस्वास्थ्यमा गम्भीर जोखिम निम्त्याएको छ ।
'वायु प्रदूषण नेपालमा जनस्वास्थ्यको संकट मात्र नभई एक ठूलो आर्थिक भार पनि हो । स्वास्थ्य उपचार खर्च र श्रम उत्पादकत्वमा हुने ह्रासका कारण देशले प्रत्येक वर्ष कुल गार्हस्थ्य उत्पादन (जीडीपी) को ६ प्रतिशतभन्दा बढी गुमाउनु परेको छ,' माल्दिभ्स, नेपाल र श्रीलंकाका लागि विभाग निर्देशक डेभिड सिसलेनले भने ।
यस आयोजनाको उद्देश्य नेपाली उद्योगहरूलाई स्वच्छ र अधिक कुशल प्रविधिहरू अपनाउन सहयोग गरी लाखौं मानिसहरूलाई हानिकारक प्रदूषणबाट जोगाउनु रहेकाे उनले सुनाए । जसले सञ्चालन लागत घटाउन, प्रतिस्पर्धात्मकता सुधार्न र दिगो औद्योगिक वृद्धिलाई सहयोग पुर्याउनेछ ।
देश औद्योगिककरणतर्फ अघि बढ्दै जाँदा आगामी वर्षहरूमा औद्योगिक उत्सर्जन वायु प्रदूषणको सबैभन्दा ठूलो स्रोत बन्ने प्रक्षेपण गरिएको छ, जसले गर्दा स्वच्छ उत्पादन प्रविधिको आवश्यकता झनै टड्कारो भएको छ । स्वच्छ प्रविधि वित्तपोषण, प्रोत्साहन र प्राविधिक सहयोगको माध्यमबाट यस आयोजनाले करिब ४०० औद्योगिक र व्यावसायिक प्रतिष्ठानहरूलाई विद्युतीय बोयलर/भट्टी, आधुनिक बायोमास बोयलर/भट्टी, वा उन्नत उत्सर्जन नियन्त्रण प्रविधिहरू अपनाउन सहयोग गर्नेछ, जसले वायुको गुणस्तरमा उल्लेख्य सुधार ल्याउनेछ ।
'उच्च प्रारम्भिक लगानी लागत, दीर्घकालीन वित्तपोषणमा सीमित पहुँच र उद्योगहरूको कम प्राविधिक क्षमताका कारण नेपालमा स्वच्छ प्रविधि अपनाउने दर न्यून छ,' दक्षिण एशिया क्षेत्रका लागि विश्व बैंकका वरिष्ठ वातावरणीय अर्थशास्त्री मार्टिन हेगरले भने, 'यस आयोजनाले लामो अवधिको वित्तपोषण र लक्षित पूँजीगत प्रोत्साहनका साथै प्रत्यक्ष प्राविधिक सहयोग प्रदान गरेर यी अवरोधहरूलाई सम्बोधन गर्नेछ, जसले उद्योगहरूलाई स्वच्छ उत्पादनतर्फ जान मद्दत पुर्याउनेछ ।'
यो आयोजना उद्योग, वाणिज्य तथा आपूर्ति मन्त्रालय अन्तर्गतको उद्योग विभाग र वन तथा वातावरण मन्त्रालय अन्तर्गतको वातावरण विभागले कार्यान्वयन गर्नेछन् । राष्ट्रिय वाणिज्य बैंकले स्वच्छ प्रविधि वित्तपोषण सुविधाका लागि ‘ह्यान्डलिङ बैंक’ को रूपमा कार्य गर्नेछ ।
विश्व बैंकको यस आयोजना वित्तपोषणमा विश्व बैंकको ‘रेजिलेन्ट एशिया प्रोग्राम’बाट ५० लाख डलरको अनुदान थप गरिएको छ—जसलाई युकेको परराष्ट्र, कमनवेल्थ र विकास कार्यालय र स्विस विकास तथा सहयोग नियोगले आर्थिक सहयोग गरेका छन् । यो आयोजना विश्व बैंकको इन्डो-गन्जेटिक प्लेन्स र हिमालयन फुटहिल्स क्षेत्रीय वायु गुणस्तर व्यवस्थापन कार्यक्रमको एक हिस्सा हो, जुन क्षेत्र विश्वव्यापी रूपमा वायु प्रदूषणको हटस्पटको रूपमा चिनिन्छ ।
.jpg)
_GnRvz8QHio.jpg)
.jpeg)
.jpeg)
.jpg)
.jpg)
प्रतिक्रिया गर्न लग इन गर्नु होस्:
Log in with Google