टाटाको एस–इभी पिकअप भ्यान सार्वजनिक, २६ लाख ९९ हजार मूल्य

दर्पण दैनिक

५ आश्विन २०८०,१३:१३

काठमाडौं । नेपालका लागि आधिकारिक बिक्रेता सिप्रदी ट्रेडिङले नयाँ विद्युतीय गाडी सार्वजनिक गरेको छ । सिप्रदीले बिहीबार एक समारोहका बीच टाटा एस–इभी पिकअप भ्यान सार्वजनिक गरेको हो । टाटा मोटर्सको कमर्सियल भेहिकल इन्टरनेशनल बिजनेस एन्ड स्ट्राटेजी प्रमुख अनुराग मेहरोत्रा र सिप्रदीका एक्जुकेटिभ चेयरम्यान सिद्धार्थ राणाले नयाँ इभी सार्वजनिक गरेका हुन् । यो गाडीको मूल्य फेस्टिभ अफरका रुपमा २६ लाख ९९ हजार रुपैयाँ तोकिएको छ ।

यद्यपि वास्तविक मूल्य भने २९ लाख ५० हजार रुपैयाँ तोकिएको कम्पनीले जनाएको छ । कार्यक्रममा राणाले टाटा मोटर्सको कमर्सियल इभी अन्तर्राष्ट्रिय बजारमा सार्वजनिक हुनेमा नेपाल पहिलो रहेको बताउँदै अहिले आर्थिक अवस्था कमजोर भए पनि विस्तारै बजार सुधार हुने अपेक्षा पनि व्यक्त गरे ।

यस्तै कार्यक्रममा अनुरागले टाटा र सिप्रदीबिचको सम्बन्ध ४ दशकदेखिको रहेको बताए । सिप्रदीका प्रमुख कार्यकारी अधिकृत राजनबाबु श्रेष्ठले नेपालमा इभीको बजार बढ्दै गएको र नाडा अटो शोले त्यसलाई पुष्टि गरेको श्रेष्ठले बताए ।

कम्पनीका सिओओ राजेशप्रसाद गिरीले ‘अन द रोड सर्भिस’मा सिप्रदी सधैं तयार रहेको बताए । सिप्रदीले नेक्सन र टिगोर इभीमा सफलता हासिल गरिसकेको छ । गाडीमा टायर प्रेसर मोनिटरिङ सिस्टम र रियर भ्यु क्यामरा छ। यस्तै ब्याट्रीको लागि वाटरप्रुफ आइपी ७६ प्रमाणित स्ट्यान्डर्ड छ। यस्तै एस–इभीमा ७ इन्चको इन्फोटेनमेन्ट सिस्टम र नयाँ इन्स्ट्रुमेन्ट क्लस्टर पनि उपलब्ध छ ।

ब्याट्री फास्ट चार्जिङले फुल चार्ज गर्दा १०५ मिनेट लाग्छ। एक पटकको फुल चार्जमा १५४ किलोमिटर रेन्ज प्रदान गर्छ । यसमा २१.३ किलोवाट आवर क्षमताको लिथियम आयोन आरन फोस्फेट ब्याट्री छ । ब्रेकको समयमा पनि ब्याट्री रिचार्ज हुन्छ ।

यस्तै यसमा २७ किलोवाटको मोटर छ । जसले १३० न्युटन मिटर पावर उत्पादन गर्छ। एस इभीको अधिकतम गति ६० किलोमिटर प्रतिघण्टा छ ।

यसको ह्वील १७ इन्च र ग्राउन्ड क्लियरेन्स १६० एमएमको छ । कम्पनीले ब्याट्रीमा ६ वर्ष वा १ लाख ६० हजार किलोमिटरसम्मको वारेन्टी दिएको छ।

यो गाडी ८० प्रतिशत फाइनान्समा किन्न पाइने कम्पनीले जनाएको जानकारी दियो ।