काठमाडाैं । महालक्ष्मी विकास बैंकको प्रमुख कार्यकारी अधिकृत (सीईओ) मा दिपेश लम्साल नियुक्त भएका छन् । मंगलबार बसेको बैंक सञ्चालक समितिको बैठकले उनलाई सो पदमा नियुक्त गर्ने निर्णय गरेको हो ।
लम्साल यसअघि महालक्ष्मी विकास बैंकमा वरिष्ठ नायब प्रमुख कार्यकारी अधिकृत पदमा रहेर कार्य गरिरहेका थिए । तत्कालीन सीईओको राजीनामापश्चात् भने उनी निमित्त प्रमुख कार्यकारी अधिकृतको जिम्मेवारी सम्हालिरहेका थिए ।
नवनियुक्त सीईओ लम्साललाई बैंकको केन्द्रीय कार्यालय दरबारमार्गमा बैंक परिवारको तर्फबाट स्वागत कार्यक्रम पनि सम्पन्न गरिएको छ । स्वागत कार्यक्रममा सीईओ लम्सालले बैंकप्रतिको जनविश्वास, निष्ठा कायम राख्दै गुणस्तरीय सेवा प्रदान गर्न सदा तत्पर रहने प्रतिबद्धता जनाए । साथै, बैंकको लक्ष्य र उद्देश्यप्राप्तिका लागि सम्पूर्ण कर्मचारीलाई प्रयत्नशील रहन पनि उनले आग्रह गरेका छन् ।
विगत १५ वर्षदेखि महालक्ष्मी विकास बैंकमा कार्यरत लम्साल विभिन्न वाणिज्य बैंक तथा विकास बैंकमा गरी करिब २८ वर्ष बैंकिङ क्षेत्रमा काम गरेको अनुभव छ ।
प्रतिक्रिया गर्न लग इन गर्नु होस्:
Log in with Google