.png "Win Recruit Nepal"){kind=logo}
काठमाडौं । धितोपत्र बोर्डको वुधबार बसेको सञ्चालक समितिले थप १३ कम्पनीलाई ब्रोकरको रुपमा काम गर्न आशय पत्र प्रदान गरेको छ ।
योसंगै अब बजारमा नयाँ २९ ब्रोकर कम्पनी आउने भएको हो।हाल बजारमा ५० ब्रोकर कम्पनी संचालनमा छन । सेयर बजारमा १० वर्षपछि ब्रोकर थपिन लागेको हो। २०६८ मा २७ नयाँ ब्रोकर थपिएर कुल ५० वटा ब्रोकर संख्या पुगेको थियो ।
धितोपत्र बोर्डले असोजमै आवेदन मागेका ४५ मध्ये हालसम्म २९ वटाले आशय पत्र पाएका हुन् ।
वुधबार सनराइज सेक्युरिटिज, जेबिएनएल सेक्युरिटिज, सेयर प्रो सेक्युरिटिज, स्टकस्टकार्टस सेक्युरिटिज, प्रोपर्टी बिजार्ड, क्यपिटल हब प्राली, मिल्की वे सेयर ब्रोकर कम्पनीले आशय पत्र पाएका हुन् ।
यस्तै, आशय पाउने अन्यमा ब्लूचिप सेक्युरिटिज, गरिमा सेक्युरिटिज, शुभकामना सेक्युरिटिज, कलश स्टक मार्केट, मनि वर्ल्ड सेयर एक्सचेन्स, मियो सेक्युरिटिज रहेका छन् ।
यी सबैले सीमित कार्य गर्ने दलालको रुपमा काम गर्नेछन्। प्रक्रियामा रहेका अन्यलाई पनि क्रमिक रुपमा आशय पत्र दिइनेछ। बोर्डले हरेक तीन/तीन वर्षमा बजारको आवश्यकता अनुसार धितोपत्र दलाल थप्न सक्ने व्यवस्था छ ।
धितोपत्र व्यापारीको लागि एक अर्ब ५० करोड, पूर्ण कार्य गर्ने धितोपत्र दलालको लागि ६० करोड र सीमित कार्य गर्ने दलालको लागि २० करोड रूपैयाँ चुक्ता पुँजी तोकिएको छ ।
आशय पत्र पाएको छ महिनाभित्रमा यी कम्पनीले पूर्वाधार तयार गरी धितोपत्र बोर्डलाई जानकारी दिनुपर्ने व्यवस्था छ ।
बोर्डले ३० दिनभित्र स्थलगत निरीक्षण र जाचबुझ गर्नेछ। बोर्डले पूर्वाधार अपर्याप्त देखेमा बढीमा तीन महिनाको समय दिएर थप व्यवस्था गराउन लगाउँनेछ । सो अवधिमा पनि पूर्वाधार तयार नगर्नेको अनुमति स्वतः रद्द हुनेछ ।
.jpg)
_GnRvz8QHio.jpg)
