.png "Win Recruit Nepal"){kind=logo}
काठमाडौं । वाणिज्य बैंकहरूको नाफामा गिरावट आएको छ । गत वर्षको साउनको तुलनामा चालु आवको साउनमा बैंकहरूको नाफा झन्डै ६ प्रतिशतले घटेको हो । नेपाल राष्ट्र बैंकको तथ्यांक अनुसार चालु आवको पहिलो महिना (साउन)मा वाणिज्य बैंकहरूले कुल ८ अर्ब ५२ करोड नाफा कमाएका छन् । यो गत वर्षको सोही अवधिको तुलनामा ५.६७ प्रतिशत कम हो । गत वर्ष साउनमा वाणिज्य बैंकहरूले कुल ९ अर्ब ३ करोड रुपैयाँ नाफा कमाएका थिए ।
अर्थतन्त्रमा आएको संकुचन र महँगो ब्याजका कारण कर्जा विस्तार गर्न नसक्दा नाफामा गिरावट आएको हो । अहिले बैंकिङ प्रणालीमा अधिक तरलता रहे पनि कर्जाको माग नहुँदा बैंकहरूले व्यवसाय विस्तार गर्न सकेका छैनन् ।
साथै, निक्षेपको ब्याज महँगो हुँदा लागत बढेकाले बैंकहरूको नाफा प्रभावित बनेको हो । बैंकहरूले महँगो ब्याजमा निक्षेप थुपारे पनि ऋण लगानी गर्न नसक्दा पैसा बैंकमै थुप्रिएर बसेको छ । महँगीका कारण बजारमा उपभोग्य वस्तुको माग बढ्न नसक्दा कर्जाको माग पनि बढेको छैन । त्यस्तै, प्रणालीमा अधिक तरलता थुप्रिँदा पनि ब्याज नघटेकाले ऋणको माग बढ्न सकेको छैन । अहिले पनि कर्जाको ब्याजदर १५ प्रतिशत हाराहारीसम्म रहेकाले ऋण लिएर व्यवसाय गर्न सक्ने अवस्था नरहेको व्यवसायी बताउँदै आएका छन् ।
यद्यपि, पछिल्लो समय अन्य क्षेत्रमा कर्जाको माग नभए पनि अटो कर्जाको भने माग बढ्न थालेको छ । त्यसैलाई मध्येनजर गर्दै बैंकहरूले पनि सस्तो ब्याजदरमा कर्जा उपलब्ध गराउन थालेका छन् ।
चालु आवको पहिलो महिनामा सबैभन्दा धेरै नाफा ग्लोबल आइएमई बैंकले कमाएको छ । राष्ट्र बैंकको तथ्यांक अनुसार साउनमा उक्त बैंकले ९९ करोड २ लाख रुपैयाँ आर्जन गरेको छ ।
दोस्रोमा नेपाल इन्भेष्टमेन्ट मेगा बैंकले ७४ करोड रुपैयाँ नाफा आर्जन गरेको छ । हिमालयन बैंकले ६३ करोड रुपैयाँ नाफा आर्जन गर्दा कुमारी बैंकले ५७ करोड रुपैयाँ कमाएको छ ।
सबैभन्दा कम नाफा कमाउनेमा नबिल बैंक रहेको छ । गत वर्ष सर्वाधिक नाफा कमाएको बैंकले चालु वर्षको पहिलो महिनामा ७ करोड रुपैयाँ आर्जन गरेको छ ।
एसबीआई १६ करोड, माछापुच्छ्रे बैंक १८ करोड रुपैयाँ, सिटिजन २४, सानिमा र स्ट्यान्डर्ड चार्टर्ड २५/२५, सिद्धार्थ बैंकले २९ करोड रुपैयाँ खुद नाफा आर्जन गरेका छन् । त्यसैगरी, कृषि विकास ३३, नेपाल ३६, एनएमबी र एनआइसी एसिया ३८/३८, लक्ष्मी सनराइज ४१, प्राइम ४२ र राष्ट्रिय वाणिज्य बैंकले ४४ करोड रुपैयाँ खुद नाफा आर्जन गरेको तथ्यांकले देखाएको छ ।
.jpg)
_GnRvz8QHio.jpg)
.jpeg)
.jpeg)
.jpg)
प्रतिक्रिया गर्न लग इन गर्नु होस्:
Log in with Google