सुस्मा लामा हत्या प्रकरण : पटक–पटक प्रेम प्रस्ताव राख्दा पनि स्वीकार नगरिएपछि हत्या

दर्पण दैनिक

४ चैत्र २०८०,१६:१३

काठमाडौं । काठमाडौंको गोकर्णेश्वर नगरपालिका वडा नं. ३ तारेभिरस्थित शिवपुरी राष्ट्रिय निकुञ्जको जंगलमा सुस्मा लामाको हत्या गरी शव गाडिएको अवस्थामा छोड्ने आरोपीलाई प्रहरीले पक्राउ गरेको छ । गत माघ २२ गतेदेखि कलेज जान भनेर हिँडेकी काठमाडौं गोकर्णेश्वर नगरपालिका वडा नं. ३ तारेभिरकी १८ वर्षीया सुस्मा लामा बेपत्ता थिइन् । उनको शव फागुन २४ गते साँझ शिवपुरी राष्ट्रिय निकुञ्जको जंगलमा फेला परेको थियो भने फागुन २५ गते उत्खनन् गरी सनाखत भएको थियो ।

प्रहरीले हत्यामा संलग्न गोकर्णेश्वर नगरपालिका वडा नं. ३ तारेभिरका २१ वर्षीय रुपेन्द्र लामालाई पक्राउ गरी सार्वजनिक गरेको हो । काठमाडौं उपत्यका अपराध अनुसन्धान कार्यालयले हत्यामा आरोपी व्यक्तिलाई आइतबार पत्रकार सम्मेलन गरी सार्वजनिक गरेको हो ।

प्रहरी अधिकारीकाअनुसार निज हत्या आरोपी व्यक्तिले सुस्मा लामालाई विगत ८ महिनादेखि एकोहोरो मन पराएको र पटक–पटक प्रेम प्रस्ताव राख्दा पनि स्वीकार नगरिएपछि हत्या गरेको स्वीकार गरेको प्रहरीले बताएको छ ।

प्रहरीका अनुसार माघ २२ गते कलेज जान भनि निस्किएकी लामा सम्पर्कमा आइनन् । माघ २३ गते फेसबुकमा विवाह गरेको फोटो पोष्ट गरिन् र आफू ३ दिनमा आउँछु भनेर पोष्ट गरिन् । परिवारले माघ २५ गते प्रहरी वृत्त बौद्धमा मानिस हराएको भनेर रिपोर्ट गरेसँगै प्रहरीले खोजतलास तथा अनुसन्धान सुरु गरेको थियो ।

एक महिनापछि फागुन २४ गते साँझ हातमात्र देखिएको अवस्थामा तारेभिरमै शव गाडिएको अवस्थामा फेला परेको र २५ गते उत्खनन् भएको जनाइएको छ। हात पेटीले कसेको र घाँटीमा टाईले कसेको अर्ध सडे गलेको अवस्थामा रहेको शव आमाले सनाखत गरेकी थिइन् । अभियुक्तको कोठाबाट खाल्डो खन्न प्रयोग भएको कुटो, मृतकको मोबाइल र किताब कापी समेत बरामद भएको छ ।

यस्ताे छ, घटनाकाे विवरण

मिति	विवरण
२०८०-१०-२२ (2024-02-05)	मृतक सुष्मा लामा कलेज गएको तर घर नफर्केको ।
२०८०-१०-२३ (2024-02-06)	सुष्मा लामाले प्रयोग गर्ने SushmaMangolianनामकोFacebook ID बाट आफूले विवाह गरेको भनि बेहुला बेहुलिको कपडा लगाएको फोटो (बेहुलाको फोटोमा अनुहार छोपेको) र Caption: ‘Sorry sabailai 3 dinma ma moaauxu’ भनि post गरेको ।
२०८०-१०-२५ (2024-02-08)	निज सुष्मा लामा २०८०-१०-२२ गते देखी हराएको भनि प्रहरी वृत्त बौद्दमा आफन्तबाट खोजतलासको लागि निबेदन दिएको ।
२०८०-१०-२६ (2024-02-09)	सुष्मा लामाले प्रयोग गर्ने नम्बरबाट निजको दिदि नाता पर्ने बिन्दा तामाङ्ले प्रयोग गर्ने नम्बरमा text message गरि kina k ko police report garekomo 3 dinmaauxuvandavandaikastomanxeyharuraix aba auxu van thanirahola aba molaibachapanivaisakyoholahamilaijailmahalera k pauxaabatataadagayarbasne ho kaisailai k kopanichintalenupardainahamroभनेको ।
२०८०-११-२४ (2024-03-07)	गोकर्णेश्वर नगरपालिका -३ स्थित जंगलमा (मृतकको घरबाट करिब १ कि.मि. टाढा, स्कुल जाने बाटो बाट करिब १० मिटर तल) दुई वटा हात मात्र देखिएको शरिरको अन्य भाग पुरिएको अवस्थामा शब भेटिएको ।
२०८०-११-२५ (2024-03-08)	उक्त शवको उत्खनन गरी सुष्मा लामाको भनि सनाखत भएको ।

अनुसन्धानबाट खुल्न आएका कुराहरू

रुपेन्द्र लामाले मृतक सुष्मा लामालाई बिगत ८ महिनादेखी मन पराउदै आएको ।
निजहरु दुबैजना घाँस काट्न, बाख्रा चराउन जंगलमा बिगत १/२ बर्षदेखी संगै जाने आउने गरेको ।
निजहरु बिच फोन सम्पर्क तथा कुनै पनि सामाजिक सञ्जालमा कुराकानी नहुने गरेको, भेटको बेला मात्र कुराकानी हुने गरेको ।
रुपेन्द्रले सुष्मालाई एकतर्फी माया गर्ने गरेको र पटक पटक प्रेम प्रस्ताव समेत राखेको तर सुष्माले अस्विकार गरेको ।
निजले मृतकलाई ८ दिन सम्म बाटोमा ढुकेर बसेको भन्ने बुझिन आएको
४ दिनदेखी खाल्डो खन्न प्रयोग भएको फलामको कुटो समेत साथमा लिई हिडेको ।
निजले हत्या पछी पुरेको स्थान पहिले नै रेकी (Reece)गरेको पाईएको ।
घटनाको दिन निज मृतक एक्लै कलेज गईरहेको देखी निजलाई बाटो छेकी प्रेम प्रस्ताव राखेकोमा मृतकले ईन्कार गरेकोले पछाडीबाट घांटी थिची अचेत बनाई पहिले नै Reece गरेको स्थानमा लगी टाई र जुत्ताको तुनाले घांटीमा कसेको र हातलाई निजकै कम्मर पेटीले बांधी कुटोले खाल्डो खनी पुरेको ।
मृतकको मोबाईल र किताब/कापि आफैंले लिई गएको ।
मिति २०८०-१०-२३ गते Google बाट अर्कैको बेहुला/बेहुलिको फोटो डाउनलोड गरी त्यसलाई edit गरि मृतकको Facebook मा ‘Sorry sabailaimoh 3 din paxiaauxu’ लेखी पोष्ट गरेको र facebook deactivate गरेको ।
मिति २०८०-१०-२५ गते मृतकका आफन्तहरु खोजतलासको लागि प्रहरीकोमा निबेदन दिन गएको कुरा मृतककै आमाले रुपेन्द्रको घरमा गई कुरा गर्दा थाहा पाए पश्चात मिति २०८०-१०-२६ गते निजले मृतकको दिदिको फोन नम्बरमा text smsगरी ‘kina k ko police report garekomo 3 dinmaauxuvandavandaikastomanxeyharuraix aba auxu van thanirahola aba molaibachapanivaisakyoholahamilaijailmahalera k pauxaabatataadagayarbasne ho kaisailai k kopanichintalenupardainahamro’ भनेको ।
निज रुपेन्द्र लामाले उक्त SMS गरे पश्चात अन्य फोन कल तथा SMS नगरेको, केही समय पछी मोबाईल समेत off गरी राखेको ।