.png "Win Recruit Nepal"){kind=logo}
काठमाडौ । सरकार र मिटरब्याज तथा ठगीविरुद्ध किसान–मजदुर संघर्ष समितिबीच ४ बुँदे सहमति भएको छ । उपप्रधान एवं गृहमन्त्री रवि लामिछानेको पहलमा गृह मन्त्रालयसँग आइतबार र सोमबार भएको वार्ता सहमतिमा टुंगिएसँगै समितिले आह्वान गरेको आन्दोलन अन्त्य भएको छ । झापाको काँकडभिट्टा र कञ्चनपुरको महेन्द्रनगरसम्मबाट २३ दिन हिँडेर फागुन ९ गते काठमाडौं आइपुगेका मिटरब्याजपीडित निरन्तर आन्दोलनमा थिए ।
सहमतिपछि उपप्रधान तथा गृहमन्त्री लामिछानेको उपस्थितिमा मन्त्रालयका सहसचिव एवं वार्ता समितिका संयोजक रुद्रप्रसाद पण्डित र संघर्ष समितिका अध्यक्ष अवधेशप्रसाद कुशवाहाले ४ बुँदे सहमति पत्रमा हस्ताक्षर गरेका छन् ।
सहमतिअनुसार मिटरब्याजपीडितको समस्या समाधान गर्न अर्को आयोग गठन गरिने भएको छ । अनुचित लेनदेन अपराधबाट सिर्जित समस्याको अन्त्य गरी दीर्घकालीन समाधान गर्नुपर्ने भन्दै त्यसका लागि आवश्यक अध्ययन तथा जाँचबुझ गरी राय÷सुझाव सहितको प्रतिवेदन पेस गर्न जाँचबुझ आयोग ऐन, २०२६ बमोजिम अनुचित लेनदेन (मिटरब्याज) विरुद्ध जाँचबुझ आयोग गठन गर्ने सहमति गरिएको हो । सहमतिअनुसार ३ महिनाभित्र आयोगले आफ्नो प्रतिवेदन सरकारलाई पेस गर्न समयसीमा तोकिएको छ ।
उक्त आयोगको कार्यादेशमा अनुचित लेनदेन (मिटरब्याज) सम्बन्धी जाँचबुझ आयोग–२०८० ले संकलन गरी नेपाल सरकार, मन्त्रिपरिषद्को निर्णयबाट नेपाल प्रहरीमा पठाइएका र आयोग गठन भएपछि निवेदकबाट प्राप्त हुने नयाँ उजुरीहरूबारे जाँचबुझ गर्नेछ । सरकारले यसअघि सर्वोच्च अदालतका पूर्वन्यायाधीश गौरीबहादुर कार्कीको अध्यक्षता ‘अनुचित लेनदेन (मिटर ब्याज) सम्बन्धी जाँचबुझ आयोग २०७९’ गठन गरेको थियो । आयोगले देशभरबाट मिटर ब्याजविरुद्ध उजुरी आह्वान गरेको थियो ।
४ बुँदे सहमति भएपछि संघर्ष समितिले आन्दोलनका कार्यक्रम स्थगित गर्ने घोषणा गरेको छ । सहमतिका विषयहरूमा जानकारी दिन र पीडितहरूका माझमा प्रतिबद्धता जनाउन गृहमन्त्री लामिछाने पीडितहरू बसिरहेको स्थान भृकुटीमण्डपमा पुगेका थिए ।
माघ १६ गते पूर्वको झापा र पश्चिमको कञ्चनपुरबाट एकैदिन पैदल मार्च सुरु गरेका पीडितहरू २३ दिनसम्म निरन्तर पैदलयात्रा गरेर फागुन ९ मा काठमाडौँ आइपुगेका थिए । उनीहरूले त्यसयता भृकुटीमण्डपमा त्रिपालमुनि बसेर निरन्तर संघर्ष गरिरहेका थिए ।
उपप्रधानन्त्री लामिछानेले सञ्चारकर्मी हुँदा आफूले सबैभन्दा धेरै चासोका साथ उठान गरेको विषयमा भाग्यले गृहमन्त्री हुँदा आफैँ समाधानको साक्षी बन्न पाउँदा खुसी लागेको बताए । लामिछानेले आन्दोलरत मिटरब्याज पीडितलाई आइतबार छलफलका लागि सिंहदरबारमा बोलाएका थिए ।
.jpg)
प्रतिक्रिया गर्न लग इन गर्नु होस्:
Log in with Google