अनलाइन स्क्यामिङ केन्द्रहरूमा अनलाइन ठगीमा परेका ५१ नेपालीको कम्बोडियाबाट उद्धार

दर्पण दैनिक

११ चैत्र २०८२,१२:३५

काठमाडौं । विभिन्न व्यक्तिको प्रलोभनमा परी विभिन्न माध्यमबाट कम्बोडिया पुगेका र त्यहाँ अवैध रूपमा सञ्चालन गरिएका अनलाइन स्क्यामिङ केन्द्र तथा क्यासिनोहरूमा ठगीमा परेका ५१ नेपालीको उद्धार गरिएको छ ।

अनलाइन ठगीका साथै विभिन्न गैरकानुनी काममा लगाइएका र कम्बोडियामा बिना राहदानी बसिरहेका उनीहरूलाई थाइल्याण्डस्थित नेपाली दूतावासको पहल र कम्बोडिया सरकारको सहयोगमा उद्धार गरिएको हो । गैरआवासीय नेपाली सङ्घ (NRNA) कम्बोडियाको सहजीकरणमा उनीहरूलाई आज नेपाल फर्काइएको छ ।

यसैगरी अलपत्र परेका वा कठिन परिस्थितिमा रहेका अन्य नेपालीलाई पनि स्वदेश फर्काउने पहल भइरहेको दूतावासले जनाएको छ । कम्बोडियामा नेपाली नागरिकलाई अनलाइन ठगीलगायतका गैरकानुनी काममा लगाइएको र उनीहरू बिना राहदानी वा भिसा अवधि समाप्त भएपछि पनि बसिरहेको जानकारी प्राप्त भएको दूतावासको भनाइ छ ।

कम्बोडियामा अवैध रूपमा बसिरहेका नेपाली नागरिकलाई नेपाल फर्कन सहजीकरणका लागि नेपाली राजदूतावास बैंकक वा गैरआवासीय नेपाली सङ्घ कम्बोडियाका प्रतिनिधिलाई सम्पर्क गर्न अनुरोध गरिएको छ । स्क्यामिङ केन्द्रहरूमा काम लगाइएकाहरूको राहदानी कम्पनीले जफत गर्ने गरेको वा एक केन्द्रबाट अर्कोमा स्थानान्तरण हुँदा राहदानी हराएको गुनासो आएको छ । त्यस्तो अवस्थामा नेपाल फर्किनका लागि नेपाली राजदूतावास बैंककले निःशुल्क एकतर्फी यात्रा अनुमतिपत्र (Travel Document) जारी गर्ने गरेको छ ।

कम्बोडियाको पर्यटनसम्बन्धी तथ्याङ्कअनुसार पछिल्लो समय सन् २०२१ मा १०१ नेपाली भ्रमण भिसामा कम्बोडिया गएका थिए । त्यसैगरी सन् २०२२ मा १,९७७ जना, सन् २०२३ मा २,९४० जना, सन् २०२४ मा ६,४०४ जना र सन् २०२५ मा ९,६७६ नेपाली कम्बोडिया गएको देखिन्छ ।

नेपाल सरकारले तोकेको मापदण्डबमोजिम श्रम स्वीकृति लिएर मात्र वैदेशिक रोजगारीमा जान तथा कसैको प्रलोभनमा परी छिटो र धेरै पैसा कमाउने लोभमा कम्बोडिया, लाओस, म्यानमार, थाइल्याण्डलगायतका मुलुकमा भ्रमण भिसामा वैदेशिक रोजगारीका लागि नजान राजदूतावासले आग्रह गरेको छ ।