काठमाडाैं । मोरङको पथरीशनिश्चरे– ७ लामाटोलीमा भएकाे १५ वर्षीया बालिका ज्ञानमति थुलुङ राईको हत्याका आरोपी पक्राउ परेका छन् । मोरङ ग्रामथान गाउँपालिका घर भई बाराको जितपुर सिमरा उपमहानगरपालिका बस्ने ३८ वर्षीय धीरेनकुमार खाँ चौधरीलाई मंगलवार पक्राउ गरिएको मोरङ प्रहरी प्रमुख एसपी नवराज कार्कीले जानकारी दिए ।
हत्यापछि फरार रहेका चौधरीलाई बेलबारीस्थित भाउन्नेको जङ्गलबाट सोमवार राति साढे २ बजे पक्राउ गरिएको उनले बताए । ‘उनी पथरीमा हत्या गरेर हिँड्दै बेलबारीको भाउन्ने आएका थिए । बालिकालाई धारिलो हतियार प्रहार गर्दा लगाएको कपडासमेत उनले फेरेर भाग्दै रहेछन्,’ उनले भने, ‘मध्यरातमा एक्लै हिँड्दै गरेको देखेपछि सोधीखोजी गर्दा उनी हत्यामा संग्लग्न रहेको पुष्टि भएको हो ।’
चौधरीको साथमा ६ हजारभन्दा बढी रकमसमेत फेला परेपछि थप प्रमाण जुटेको उनले बताए । खोटाङ घर भएकी १५ वर्षीया बालिका ज्ञानमतिको सोमवार राति शौचालय गएकाे समयमा धारिलो हतियार प्रयोग गरी हत्या भएको थियो । उनी कक्षा ७ मा अध्ययनरत थिइन् । उनी मामाको घरमा बसेर पढ्दै गरेकी थिइन् ।
प्रतिक्रिया गर्न लग इन गर्नु होस्:
Log in with Google