राष्ट्रिय युवा संघ नेपाल ललितपुरद्वारा आनन्दवन अस्पताल परिसरमा वृक्षारोपण

दर्पण दैनिक

११ श्रावण २०८१,२१:४७

ललितपुर । राष्ट्रिय युवा संघ नेपाल ललितपुर जिल्ला कमिटीले ललितपुरको टिकाभैरव स्थित आनन्दवन अस्पताल परिसरमा वृक्षारोपण कार्यक्रम सम्पन्न गरेको छ ।

राष्ट्रिय युवा संघ नेपालले ७३ औँ मदन जयन्तीको अवसरमा सञ्चालन गरिरहेको एक महिने वृक्षारोपण कार्यक्रम अन्तर्गत "एक युवा पाँच बिरुवा" नारासहित शुक्रबार उक्त स्थानमा वृक्षारोपण गरेको हो ।

युवा संघका केन्द्रीय अध्यक्ष क्षितिज थेवेको प्रमुख आतिथ्यमा गोदावरी नगरपालिकाको सामुदायिक वन क्षेत्रमा गत बैशाख १८ गते आागलागी भएको आनन्द वन अस्पताल परिसरमा विभिन्न जातको दुई सय बिरुवा रोपिएका छन् ।

उक्त अवसरमा बोल्दै संगठनका अध्यक्ष क्षितिज थेबेले निरन्तर रुपमा सामाजिक कार्यमा काम गरिरहेको युवा संघले एक महिने वृक्षारोपण कार्यक्रम सम्पन्न गरेसँगै देशभर भईरहेको रगत अभावलाई सहयोग गर्ने उद्देश्यका साथ देशैभर रक्तदान कार्यक्रम सञ्चालन गर्ने बताए ।

साथै उनले भाद्र महिनापश्चात आउनसक्ने डेंगु रोगको प्रकोपलाई नियन्त्रण गर्नका लागि काठमाडौं उपत्यकाभरका सामुदायिक विद्यालयहरुमा डेंगुविरुद्ध स्प्रे अभियानसमेत सञ्चालन गर्ने बताए ।

वृक्षरोपण कार्यक्रममा बाग्मती प्रदेशका श्रम, रोजगार तथा यातायातमन्त्री प्रेमभक्त महर्जन, एमाले केन्द्रीय सदस्य हरिकृष्ण व्यञ्जनकार तथा जिल्ला तथा स्थानीय नेताहरुको सहभागिता रहेको थियो ।